الحمد لله وصلت كندا بعد رحلة اليمة
مشيت من جدة الساعة 4 فجر السبت وبعد توديع الاهل وانواع البكا والالم .. خصوصا من ميعاد اختي الصغيرة 😦
وكانت رحلتي عالخطوط الالمانية 5 ساعات لحد المانيا – فرانكفورت تزانزيت
وقعدنا في مطار المانيا 5 ساعات كانت مرررة متعبة …
وصراحة تفاجئت من مطارهم مرة معفن ومافي كراسي كتيرة الناس جالسين على الارض
وتعاملهم سئ خصوصا مع العرب
وبعدها طلعت على الرحلة الثانية من فرانكفورت – الى فانكوفر في كندا
والرحلة كانت مميتة 10 ساعات واحنا في الجو
وكمان كان مقعدي في اخر الطيارة واخويا مقعده في اول الطيارة وماقدرنا نبدل
وكانو كل اللي جنبي المان 🙂
يعني مافي فايدة حتى اتكلم مع احد
بس في فترة من الرحلة حسيت ببرد مو طبيعي ولما طالعت في الشاشة لقيت اننا عند القطب الشمالي وكانت درجة الحرارة برة الطيارة -63 درجة مئوية
شوفو الصور
المهم وصلنا مطار فانكوفر الساعة 12ليل بتوقيت السعودية والساعة 2 الظهر بتوقيت فانكوفر
وقعدنا في المطار ساعة ونص لحد ما خلصنا الاجراءات
وخرجنا اخدنا تاكسي وطلع السواق ايراني مسلم بس مايتكلم عربي
وقعد طول الطريق يتكلم معانا >>> تخيلو لما عرف اني تخصصي كمبيوتر طلع يعرف لغات برمجة وقعد يسألني عنها ويقلي هدي حلوة ودي صعبة !!
وطبعا التاكسي فيه جهاز GPRS عشان يمشي بالخرايط 🙂
وصلنا الفندق (هولدي ان) واقول للريسبشن خلي احد يجي يشيلنا الشنط >> يقلي ماعندنا عمال خدي العربية وشيلوها بنفسكم
استغربت فندق 4 نجوم ومافي احد يشيل الشنط !! ولا هو عندهم النظام كدة في كل الفنادق ما ادري !!!!
واخيرا دخلنا غرفتنا وهذا سريري
نمت على طول نومة عميييقة ماحسيت بنفسي الا بعد 9 ساعات متواصلة من النوم
قمت مفجوعة اني نمت كل دا الوقت لانو العادة نومي مقطع
ودحين بعد شوية حاطلع افطر ميتة جوع ما اكلت شي من الطيارة
هذي رحلتي الشاقة باختصار لكندا
وحنبدأ اليوم نكمل اجراءاتنا في الملحقية والبنك والشقة …. الخ 🙂
دعواتكم
وحشتووووني مرررة 🙂
Filed under: أحداث،رحلات،شخصي | Tagged: canada،trip | 9 تعليقات »