لاب توب جديد

قبل فترة طووويلة كنت ابغى اشتري جهاز لاب توب جديد وكان نفسي مرة اتحول للماك بس بعد البحث والتحري لقيت انو مو مناسب لمتطلباتي ، بدأت بعدها في رحلة البحث عن نوع آخر ،، وبما انه لاب توبي القديم من نوع سوني فايو بس الستايل القديم اللي قبل الملون وصراحة اتحملني كثير واتحمل الرك اللي كنت اعمله فيه فكنت مرررة متحمسة اني اشتري كمان سوني لكن بعد ما تحول السوني لصناعة يابانية وبدأت اسمع عن مشاكله من الناس اللي اشتروه صرفت نظر عنه ،،

بالنسبة لبقية الشركات حأقلكم السبب الشخصي اللي خلاني استبعدها:

1. توشيبا >>> من الله ما احب هذي الشركة واحسها عفشة ومرررة ماتناسبني

2. ديل >>> حقيفي حمال أسية من ناحية الاستعمال لكن من ناحية تحمل شغل جامد فيه زي شغلي ماتوقع يمشي معايا

3. ايسر >>> مرة كان خارج اطار التفكير لاني اساسا ضد الشركة دي تعباااانة مرة

4. اتش بي >>> اجهزتها عملية بس تعلق كتير وهذا اكتر سبب خلاني استبعدها

5. اما شركة LG  وسامسونج وسيمنز >> ماني مستوعبة انهم شركات يصنعوا لاب توبات احسهم يادوب عليهم غسالات وثلاجات خخخ

طيب في النهاية اخرتك ايش ؟؟؟؟

اخترت شركة asus  بعد السؤال والتحري وكثير مدحوا لابتوباتها وان كان لها بعض النقاط السلبية لكن مقارنة بنقاط الشركات الثانية (في نظري طبعا) اهون ..

بس كانت مشكلتي العويصة اني ما ابغى نظام الجهاز فيستا ابغاه xp بس للاسف مطلبي دا كان مرفوض من معظم المحلات اللي رحتها ، والناس اللي وافقت تديني اللاب توب بنظام xp اصلي قالتلي انو بعض تعريفات الجهاز زي الكام والبلوتوث ممكن مايتعرف على الاكس بي ..

فقررت اني اجازف واشتري الجهاز فيستا ولو ماقدرت اتعامل معاه او اصبر عليه احوله بعدين لـ xp وامري لله ..

طيب باقي تشوفوا الجهاز … قولوا ماشاء الله وشوووفوا تحت

باقي تباركولي باللاب الجديد

الله يعطيني خيره ويكفيني شره ياااارب

طبعا لسه ماعندي انطباعات عنه

لحد الان ماشفت خيره من شره

اكيد بعد فترة حأوافيكم بتطوراتي مع وليدي الجديد 🙂

Advertisements

23 تعليق

  1. مبروووك 🙂

    تكسريه بعرق العافيه
    الله يعطيكي خيره ويكفيكي شره
    ان شاء الله

    الدور عليا عما قريب ان شاء الله
    لانوا لاب توبي تحملني بما فيه الكفايه

  2. مبروووووووووك ..
    و عقبال الماك بإذن الله ..

  3. خوخة
    الله يبارك فيك يارب
    اميييين 🙂
    وان شاء الله ربنا يرزقك انتي كمان بابن الحلال 🙂 ويوفق بينكم يارب خخخخ

    بندر
    الله يبارك فيك يارب
    اصلا مو مخليني متشعلقة في الماك الا اللون الابيض وبرامجك التحفة 🙂

  4. ألف مبروك

    يلا بكدا معد لك عذر تنقطعي عن التدوين

    هههههههه

  5. الله يبارك فيك صارخ
    ان شاء الله ما انقطع 🙂 لحسن التقنية سببت لي أزمة خخخ

  6. الف مبروك الجهاز الجديد ..
    asus مدحوها كثير .. لما جيت اشتري لاب توبي كنت مرة محتارة بينه وبين السوني واخترت السوني ف النهاية ..
    اختي دحين عندها اسس ومرة مبسوطة بيه ماشاء الله ..
    يلا تكسريه بعرق العافية 🙂

  7. سلاااااااام:
    مبروووووووووووووووووووووك اللاب توب الجديد بس و الله بينتي أنك شاطرة في كشف العيوب و أكيد أصدقائك راح يخافوا على أنفسهم منك أصلك رايحة تكشفي كل عيوبهم بس يالله رحم الله عبدا أهدى إلينا عيوبنا ، مبروك مرة ثانية …

    تحية من بنت الجزائر .رايي.

  8. مبرووووك الله يعطيك خيره أنا معايا إتش بي وأعتبره الأفضل ولو غيرت راح أشتري ماك اما لو في الويندوز ما أشوف أفضل من إتش بي أنا متعصبه له مو واقع تجربه 5 سنوات

  9. ماشااااااااااااء الله تباركـ الرحمـن ,..

    مبروكـ اختي أودهـ ..
    تفككين مفاتيح الكيبورد بالعافيه قولي آمين ههههههههههههههه

    ومن ناحية المقارنه انا اختلف معكـ ..
    ابعطيكـ رايي قريباً ..

    😉

  10. الله يبارك فيك اينوقة
    والله صراحة السوني ولد حلال بس انخرب مع الزمن خخ وان كنت لازلت اتحفظ على رأيي الاصلي في بعض انواعه زي SR و Z بس اسعاره خيالية 🙂
    يبغالي اجل اتصاحب مع فاطمة 🙂

    رايي اهلا وسهلا فيك نورتيني
    الله يبارك فيك يارب .. اتطمني ادقق في الاجهزة بس خخخ

    مشاعل
    الله يبارك فيك ، امييين يارب عقبالك 🙂
    بس ان شاء الله تصيري ماكية عشان ماحب اتش بس 🙂
    عموما هو يفرق كمان ترا في نوعية استخدامك للجهاز
    ياستي يقلك كل واحد ينام على الجنب اللي يريحه ولا ؟؟ 🙂

    احساس اهلين
    الله يبارك فيك يارب
    >>> بعدين مين وشى لك عني بسالفة مفاتيح الكي بورد خخخخ (( ترا عندي سواليف لليل مع كيبورداتي هههه ))

    اكيد انتظر رأيك 🙂

  11. مبارك يا ستي.. يتربى في عزّك!

  12. الله يبارك فيك نجاة
    🙂

  13. ماشاء الله
    الله يطعمك من خيرة ويكفيك شرة
    أسوي شركة رائدة
    وبالنسبة للفسيتا أنصحك وبعنف تتعودي عليه يختي مرة مرة راقي ورايق

    والله يهنييكِ

  14. هلا toop
    امييين يااارب
    حمستيني 🙂
    اما الفيستا .. انا احسه قرافيكال سيستم .. ضيع حلاوة النظام في كلافة التصميم وماراعى الثقل اللي راح يسببه ، بالاضافة انو استخدم فكرة (فين ادنك ياجحا) >> عشان الواحد يوصل للشي اللي يبغاه يلف من ابعد الطرق !!!
    عموما انا اللي مصبرني عليه .. هو اني متخصصة في مجال التقنية ولابد اني اتعرف على بيئة النظام والمشاكل واعرف كيف اتعامل معاها .. عشان ابدا مو حلوة في حقي انو لو احد جا سألني عن الفيستا اقول ما اعرف !! ….

  15. ماشاء الله مبرووك وتكسرينه بالعافيه

    >>>>>> يفكر يشتري جهاز ويحيل الجهاز القديم لتقاعد ^^”

  16. مبروك اللابتوب الجديد : )
    موفقة اوده ^^

  17. دكتور كول
    الله يبارك فيك
    هيا شد الهمة 🙂
    نورتني

    غضون
    الله يبارك فيك
    جميعا يااارب
    اهلا وسهلا

  18. مبرووووك ليه ما قلتيلي ؟؟؟!!
    انشالله تنبسطي بيه ويكون على قد طموحاتك في الحياة
    خخخخخخ
    احسه حجمه كبيير

  19. ماشاء الله مبرك الجهاز

    أسوس شركة مميزة وفي الآونة الأخيرة أزدادت توهجاً والإقبال على أجهزتهم في ازدياد
    إختيار موفق

  20. الله يبارك فيك ملاك
    افتكر اني قلتلك !!
    ان شاء الله يارب >>> وبلاش طنازة خخخ
    مو كبير نفس حجم السوني اللي كان عندي 13 انش

    مدهش اهلا وسهلا
    الله يبارك فيك
    معاك حق اسوس شركة قوية بدأت تظهر عالساحة

  21. اقول المفروض كلمة شكر ليا عشان راسي اللي جلس يفكر معاك لما اشتريتي لاب توب السفيرة عزيزة

  22. Congratulations, the device promises to be your Lord and be successful and I hope Tireless in maintenance

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: