ابحث على ماتريد ببساطة

تدوينتي هذي المرة تقنية وهي عن موضوع البحث العلمي في الانترنت

 لكنها تعتمد على طريقتي الخاصة في البحث >>> يعني لحد يجي يقول هذا شي مو علمي 🙂

الموضوع كله خلاصة تجربة شخصية ..

طيب بسم الله نبدأ

اول شي عشان تبدأ البحث عن شئ في الانترنت لازم يكون عندك موضوع محدد ..

الخطوة الاولى : حدد جميع المصطلحات العامة اللي تتعلق بموضوع بحثك

بافتراض انك بتبحث عن شعارات تسويقية على سبيل المثال

راح تبحث بأحد المصطلحات العامة التالية : تسويق – أسس التسويق – شعارات تسويقية – اعلانات تسويقية – كيف تكتب شعار تسويق  … الخ

أي حاجة ممكن توصلك لبداية الطريق ،،

وطبعا كل نتيجة بحث لأحد المصطلحات ممكن توصلك لمصطلح جديد ماتكون تعرفه يصير تقدر تستخدمه في البحث من جديد ..

حأرجع اكمل على المثال السابق  لما كتبت (شعارات تسويقية) في احد محركات البحث ظهر لي مصطلح انجليزي اسمه slogans واللي بيستخدم كمصطلح علمي في الحملات التسويقية ..

بكده أنا حصلت على مصطلح جديد اقدر ابحث عن طريقه مثلا حأكتب ( استخدام slogans  في التسويق)  حتظهر لي النتائج اكثر دقة

ولاحظوا انه كل ماكان البحث يتضمن مصطلحات انجليزية ممكن تلاقي معلومات افضل واكثر (لأنه مع الأسف المحتوى العلمي الانجليزي اكثر وأدق من المحتوى العربي 😦  )

الخطوة الثانية : قارن بين النتائج

طبعا بعد ما انتهيت من الخطوة الأولى حتكون خرجت بمجموعة كبيرة من النتائج (المواقع) ابدأ القي نظرة سريعة على المواقع اللي عندك وقارن بين المعلومات اللي فيها

كنسل المواقع اللي ماتفيدك او مافيها الشي اللي انت تبغاه .. وابدأ تأكد من المعلومات .. راح تلاقي معلومات مكررة هنا وهنا .. وممكن تلاقي معلومات متضاربة أو متعاكسة هنا وهنا .. وممكن تلاقي معلومة بسيطة لو سطر مثلا في موقع وفي مكان تاني تلاقي جزء كبير مفيد ..

المعلومات المتكررة غالبا بتكون صحيحة كون انو اتفق عليها اكثر من موقع .. اما المعلومات المتضاربة فحاول تبحث عنها اكتر وتعتمد على المواقع العلمية والخبرات العملية اكثر من النقاشات الشخصية ..

بكدة حتطلع بكم جميل من المعلومات السليمة والمفيدة 🙂

 

طيب في سؤال مهم .. ايش هي افضل محركات البحث ؟؟

طبعا السؤال دا مافي له جواب محدد يقيناً .. وممكن يختلف من شخص لآخر لكن انا اقول حسب تجربتي الشخصية

اني باعتمد على عمنا google كمحرك بحث اساسي للمواقع العربية غالبا

وباعتمد على عمنا الثاني ask كمحرك بحث للمواقع الانجليزية وكمان اذا كنت ابغى ابحث عن صور .. (بس طبعا جيب المسمى الانجليزي للشي اللي بتبحث عنه >> حتلاقي نتايج حلوة وكتيرة)

 

صدقوني رغم بساطة الأسلوب (ويمكن عدم اعتماده على اساس علمي في البحث) إلا اني غالبا بأطلع بنتايج مرضية لي على الصعيد الشخصي ودايما بيتكرر السؤال لي (انتي من فين تجيبي المعلومات دي انا دورت ومالقيت شي ؟!!)

انا كدة كشفت لكم سري في البحث 🙂 .. والحمد لله بدا الأسلوب في معظم الأوقات بألاقي الشي اللي انا ابغاه سواء معلومات او برامج او صور .. او اي كان !

 

Advertisements

9 تعليقات

  1. معلومات حلوه……..صرحه اول مره اعرفها……..
    >>>>واناا اختك وما تقوليلي<<<<<<<<
    🙂

  2. خطيرة يابت
    مابتلعبي 🙂

  3. شكرا على السر الخطير

    أخيرا عرفنا العقول الديجتال كيف تبحث في النت

  4. اهلا مشاعر
    خخخ ماقد سألتيني 🙂

    toop ياهلا
    ههههه 🙂

    صارخ اهلين
    العفو 🙂

  5. موضوع جيد يا أودة ..
    و جهد تشكري عليه .
    بس عارفة لو تتعمقي كمانة شويتين يكون احلى ..
    ليش ما تحاولي تكتبي عن كيفية حصر البحث بنوع مخصص من الملفات ..
    عشان الطيبين يستفيدوا ..
    أحب اشكرك مرة تانية ..
    لكي مني اجمل تحية و دمتي بود .

  6. واااااااو
    ماشاء الله عليك أودتي

    طريقه سهلة وحلوووه
    راح أعتمدها ف بحوثي ان شاء الله

    جزاك الله خير حبيبتي
    دمت مبدعه 🙂

  7. ماشاء الله تباركـ الرحمن ..

    رائعه يا أودهـ ..
    طريقة ممتازهـ جداً ..

    شكراً لكـ خيتي ..

  8. شكرا أوده…أعلم أن صديقتي رائعة (:

  9. امنية ياهلا فيك
    كويس عجبتك الطريقة >> وان شاء الله حتشوفي الفرق 🙂
    وياك ياقلبي

    ماسة
    تأكدي انو وجودك هو الأروع 🙂

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: