ذكريات لا تنسى

** ذكريات لاتنسى **

هذا الواجب ايانق 🙂

– أفضل مرحلة تعليمية درستها ؟

المرحلة الجامعية

لاني شفت المجتمع (بصورة مصغرة) .. ولانو مجتمع الجامعة علمني اشياء كثييييرة ابدا ما كنت حأتعلمها

عرفت كيف اكتسب صداقات حقيقية .. عرفت اميز بين صديقة المصلحة وصديقة الدراسة وصديقة القلب

عرفت اخد حقي بنفسي .. وانجز اعمالي ومصالحي بنفسي >>> يعني اتعلمت اعتمد على نفسي بالعربي

2– أسوأ مرحلة تعليمية مرت عليك ؟

سادس ابتدائي – والمتوسطة كاملة

سادس ابتدائي >>> لاني نقلت من مدرسة اهلية لمدرسة حكومية لاول مرة بعد مادرست من فترة التمهيدي الى خامس في مدرسة اهلية ولظروف طارئة اضطروا اهلي ينقلوني لمدرسة قريبة من بيتنا (حكومية)

طبعا تعرفوا كنت في المدرسة الاهلية >>> انواع الدلع والمجاغة وكل شي نظيف ومرتب ويجيني لحدي

واتفاجئت من الوضع في المدرسة الحكومية بداية من المبنى المتهالك ومرورا بالمريول الاخضريك 🙂 وانتهاء بأسلوب التدريس والضرب والتهزيئ

المتوسطة >>> كانت مرحلة بداية الشقاوة بالنسبالي بس اللي كان كابتني انو ماما كانت وكيلة المدرسة وطبعا انواع التهديد من البيت اني لو سويت شيطنة ولا شي حأنضرب واتخاصم قبل الكل ومحيشفعلي ابدا انها وكيلة في المدرسة … عاد انا بسم الله علي سمعت الكلام وطلعت الطالبة المثالية في الثلاث سنوات خخخخ بس كنت عايشة في كبت نفسي بسبب كتمان الشقاوة

3– أفضل المدرسين اللي مروا عليك ؟

من المرحلة الابتدائية ما اذكر

من المرحلة المتوسطة أ/نورة احمد مدرسة الجغرافيا – أ/فوزية الجابري مدرسة العلوم

من المرحلة الثانوية تقريبا معظمهم كانوا ممتازين ومنهم أ/خديجة باسلوم مدرسة الكيمياء – أ/اميرة مدرسة العربي – أ/ آمال مدرسة الرياضيات – أ/أمل مدرسة الانجليزي

4– أحب المواد اللي درستها ؟

البرمجة بكل مستوياتها في الجامعة

الشبكات برضوا في الجامعة

الرياضيات والانجليزي في الثانوي

5– أكره المواد اللي مرت عليك ؟

البلاغة >> رغم اني مادرستها الا اولى ثانوي بس مرة كرهتها

الكيمياء >> عشان طلعت عيوني من الدوشة اللي فيها

اما في الجامعة مادتين كانت بجد من اكره المواد واغلسهم على قلبي مادة ذكاء اصطناعي ومادة نظم خبرة

6– آخر شهادة علمية حصلت عليها , وتخصصك ؟

بكالوريوس علوم الحاسب الالي مع اعداد تربوي

7– أطرف موقف مر عليك في دراستك ؟

كثيرة المواقف الطريفة اللي مرت عليا ايام دراستي بما اني شقية بصمت خخخ

ورغم اني هادية نوعا ما .. بس كنت اشارك في الشقاوات >> حتى المعلمات لما يكتشفوا انو انا من ضمن البنات اللي بيعملوا حركات خخخ يخاصموني مرة ويقولوا حتتتتتى انتي !!!

بسس اطرف موقف مر عليا ولازلت اذكره بوضوح لحد الان في مرحلة التمهيدي

قلتلكم فوق اني كنت في مدرسة اهلية وكانت اختي الكبيرة معايا في المدرسة

طوابير البنات من اولى ابتدائي لسادس ابتدائي تصير اول شي بعدين طوابير التمهيدي والروضة تصير بعد ما يطلعوا جماعة الكبار فصولهم

فأذكر اني كنت اجلس مع اختي الكبيرة فوق مكان مرتفع زي التل من التراب لحد ماتصير طوابيرهم وبعدين اقوم >>> لاني ماكنت مصاحبة احد وكنت مررررة انطوائية وهادئة

المهم وانا جالسة فوق التلة جات وحدة من صاحبات اختي ماشاء الله طويلة ودبة ودقتني وهي ماشية من غير ماتنتبه وانا طبعا كنت مرررة شي صغير ونحيف فعلى طول طحت من فوق التلة ونزلت بمؤخرتي على سلة الزبالة (الصغيرة الشبك ) الله يكرمكم وانعزقت فيها ههههه

جات اختي تبغى تطلعني وصارت تسحبني بس ماقدرت تطلعني ووقتها دق جرس طوابير الكبار قامت اختي راحت وسابتني في الزبالة

وطبعا انا من هدوءي الزايد ماتكلمت ولابكيت ولا شي جلست في مكاني لحد ما خلصت الاذاعة وطلعوا طوابير الكبار وعملوا طوابير التمهيدي وطلعوا على فصولهم .. وبالصدفة معلمتي مرت من جهة الزبالة هديك ولمحتني وفطست علي ضحك وقالتلي انتي من متى هنا احنا حسبناكي غايبة ههههههه

بس وخرجتني من الزبالة وانتوا بكرامة وعدت على خير خخخخخ

8– أصعب موقف مر عليك في دراستك ؟

يوم مناقشة مشروع تخرجي في الجامعة

كنت انا وزميلاتي مواصلين تقريبا لنا اكثر من يوم .. عدا عن ساعات كنا نسرقها سرقة عشان ننام فيها بالغلط على الكمبيوتركمان ..

طبعا يوم مناقشة المشروع وبما اننا بنات حاسب ومشروعنا كان نظام على الكمبيوتر … كان لازم ننقل العمل حقنا كله على جهاز كمبيوتر واحد عشان ينشبك على الشبكة وينعرض عند الرجال ..

فجيت ابغى احط الجزء اللي اشتغلت عليه انا واثنين من بنات مشروع التخرج .. ونسخت الشغل وحطيته وجيت اجرب النظام .. لقيته مو شغال بسبب اختلاف الجهاز وامور برمجية ((اللي يعرف في البرمجة وقواعد البيانات حيعرفها)) ..

طبعا جاني انهيار وصرت ابكي وبكيت البنات معايا >>> طبعا الكل كان على اعصابوا ..

بس الحمد لله عدت المناقشة على خير واخدت المشروع بامتياز J

تعبت وانا اكتب J

امرر الواجب لـ

ملاك >>> اختي اللي سابتني في الزبالة خخ

أنين

القائد

Advertisements

14 تعليق

  1. يعني لازم تصير سيرتي على كل لسان..حردهالك ما تخفيش يا اختي
    عاد اش اسويلك حاولت اطلعك وما طلعت ..عاد التناحه في اختي ماشالله قعدت في الزبالة واستسلمت للأمر الواقع خخخخخ

  2. خخخخ شايفة كيف بس
    ايوه على طول تستسلمي واختك الغلبانة تجلس في الزبالة مدري كم ساعة
    يلا هي ذكرى حلوة ومضحكة في النهاية 🙂

  3. اضاربو الاخوات

    هههههههههههههههههههه

    وانا لو مكانك يا ملاك … على طول افك الارشيف واطلع قصة اخطر من دي

    وانا مح اقصر حسويلكم اعلانات في مدونتي

    >>>احس اني بسوي شي فلة (عشان اللي قالو عني مجرم ما اطلعهم كدابين هع هع هع)

  4. بالله يا صارخ تقارن دا الشي بفعلتك الشنيعه ابدا ولا في وجه مقارنة وعلى حكاية اني بطلع قصة اخطر من دي بطلعها بس خليني اتزكر لحسن مخي مقفل

  5. ملاك … انا فقشت اتنين بالغلط مو سبت اختي متعمد في الزبالة ولا كانو كنا في بطن وحدة في يوم من الايام

    >>> مروج كيف ما اعرف احرش

    ههههههههههههههه

    ورد بليز قبل ما يبرد الوضع طلعيلنا موقف دقي الحديد وهوا حامي

    >>>ألاخوات يتجمعوا عليا وحيفقشوا راسي وخصوصا اني قالب الموضوع شات

  6. هههههههه قاعد تحرش ياصارخ هاااا
    اقول بس استريح الله يسلمك خخخ
    اختي طييييبة ماتسويها 🙂

  7. ههههههههههههههههههههههه

    من جد ضحكت على الموقف الطريف ههههههههههه
    لو أنا مكاااانك كان صراخي وصل لآخر الدنياااا

    الله يخليك أختك ههههههه

  8. هههههههههههههههه
    من جد موقف خطيير الي حصل معك الحمد لله ان معلمتمك انبتهت والا كان ظليتي اليوم كله 🙂

    تبقى للدراسه ذكريات جميله والله
    شكرا لك على التمريره استمتعت بحل الواجب كثير

    تحياتي وتقديري

    أنين

  9. هههههه هلا مشاعل
    ياحليلك شكلك كنتي عاملة ازمة لاهلك بصراخك وانتي صغيرة خخخخ
    نورتي 🙂

    حيا الله الغالية انين
    صادقة والله ربنا ارسلها لي 🙂
    العفو .. اكيد كلنا استمتعنا بالواجب دا واعدنا الذكريات ..
    اسعدني تواجدك

  10. ههههههههههههههههههه

    موقف طريف من جد 😛

    مشكورة على حل الواجب مروج

  11. هلا خالد 🙂
    ههههههه
    العفو ..

  12. لقد مررت عليكم واجب (أذكر 6 أسرار قد لا يكتشفها من يقابلك أول مرة)
    http://alghaslan.net/asraryal6

    تحياتي

  13. ابشر استاذ ياسر مع انه الواجب صعب بس نحاول 🙂

  14. ياااااااي ذكرتيني بالثانوي

    برضوا درستني ابلة خديجة يازينها

    انا كمان كنت في 37 روووووعه بجد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: